Etiqueta: creación

Saúde mental: loitar contra o estigma

por tiesaquis, posted in Charlas-Obradoiros,Concursos

Coa coordinación do departamento de Orientación, o luns 12 de decembro presentáronse nas aulas de 1º ESO A e B as pezas divulgativas creadas no marco do proxecto “Un intruso no meu cerebro”, ideado pola Asociación Lar Pro Saúde Mental en colaboración coa Consellería de Sanidade da Xunta de Galicia, e dirixido á loita contra o estigma das enfermidades mentais na mocidade de entre 11 e 13 anos. Trátase dunha Campaña de Sensibilización sobre a saúde mental no ámbito infanto-xuvenil a través de diversas pezas divulgativas (cómic, curta de animación, GIF, adhesivos e pasatempos), deseñadas dende unha perspectiva lúdica, dinámica e divertida.

Derivado da anterior actividade, comezamos o ano parabenizando ao noso alumnado de 1º da ESO pola súa meritoria participación no concurso do citado proxecto e no que resultaron premiadas con cadanseu terceiro premio as alumnas Carla Pérez Montero e Lara Piñeiro Garabán.

Outro ano regueifando

por tiesaquis, posted in Charlas-Obradoiros
Lupe Blanco explicando as orixes da regueifa

Neste mes de novembro volveu a regueifa ao centro. Un ano máis e aproveitando o programa que pon en marcha a Deputación de Pontevedra e a Asociación ORAL, quixemos que o noso alumnado de 1º da ESO experimentase coa palabra rimada e improvisada. En dúas sesións que estiveron dirixidas por dúas grandes figuras regueifeiras, Lupe Blanco e Josiño da Teixeira, a rapazada máis nova do noso centro comprobou como a tradición oral nos conecta con moitas outras culturas no mundo e ademais é unha ferramenta de aprendizaxe e de diversión.