Comunidade escolar – tI ES Aquis

Milla solidaria e pola lingua

31 Xaneiro, 2023 por tiesaquis, posted in Celebracións,Comunidade escolar,Sin categoría

Dentro das actividades do programa de dinamización da lingua 21 Días co galego e +, este pasado luns 30 de xaneiro o alumnado da ESO do Aquis Celenis participou nesta iniciativa conxunta co Afonso VII. A actividade física como hábito saudable, a solidariedade coa veciñanza menos favorecida e a mensaxe de apoio e de confianza no futuro do noso idioma confluíron de xeito complementario na realización desta actividade.

Ao día seguinte, o martes 31, unha representación do alumnado do Aquis fixo entrega aos Servizos Sociais do Concello de Caldas de Reis dos produtos non perecedoiros recollidos como inscrición voluntaria e simbólica na Milla.

Grazas a toda a comunidade educativa do Aquis Celenis pola súa colaboración.

AstrónomAs

29 Xaneiro, 202329 Xaneiro, 2023 por tiesaquis, posted in Comunidade escolar,Exposicións

Este luns 30 de xaneiro remata a exposición AstrónomAs no Aquis Celenis; unha mostra que chegou ao noso centro por iniciativa do profesorado do Club de Ciencia e grazas á colaboración do Observatorio Astronómico R. M. Aller, da Universidade de Santiago de Compostela.

Desde o pasado día 17, toda a comunidade educativa do Aquis puido achegarse a esta exposición que fai visible as achegas de moitas investigadoras que procuraron botar luz nos misterios da Astronomía.

A través de dezaseis paneis ofrécese gran variedade de contidos e elementos interactivos que mostran o protagonismo que tiveron e teñen as mulleres nesta disciplina.

Especialmente motivador para o alumnado foi o xogo interactivo de busca de pistas ao que o se accede a través de códigos QR.

Reactívase a Escola de familias

22 Decembro, 2022 por tiesaquis, posted in Escola de familias

Logo duns anos de pandemia nos que houbo que parar moitas dinámicas xa creadas, este curso no Aquis tratamos de ir activando algunhas propostas que cremos fundamentais para a nosa comunidade educativa. É o caso da Escola de familias que, coordinada desde o Departamento de Orientación, achegou unha primeira xornada formativa sobre como acompañar aos fillos e ás fillas no bo uso das novas tecnoloxías.

A relatora foi Jeniffer Herbón, psicóloga xurídico-forense, especialista en mediación. É ademais creadora e formadora de ConVive+.

Previamente, Jennifer desenvolvera tamén unha sesión divulgativa, para o alumnado de 1º da ESO, sobre as oportunidades e os riscos que ofrecen as novas tecnoloxías.

25 N: combatendo a violencia contra as mulleres desde a educación (II)

6 Decembro, 2022 por tiesaquis, posted in Celebracións,Comunidade escolar

O Día Internacional para a eliminación da violencia contra a muller conmemorouse este 25 de novembro no Aquis Celenis con dúas accións que se sumaron a todo o comentado xa en anteriores entradas.

Por unha banda, sumámonos á proposta dun minuto de silencio, ás 12:00 do venres 25, do Observatorio Galego da Violencia de Xénero. Fixémolo diante da entrada do instituto e visibilizamos, vestindo de negro, o noso rexeitamento a todo tipo de violencia contra as mulleres. Neste sinxelo acto lemos tamén o poema “Perségueme a historia…” de Luz Airado Bello.

Ademais, ao longo de toda a mañá, desenvolveuse no centro unha acción artístico-reivindicativa coordinada polo departamento de Música. Un total de 9 alumnos/as de 1º Bacharelato, repartidos en grupos de tres, pasaron polas aulas do instituto para recitar, con acompañamento musical, o poema “O xiz” de Andrea Fernández Maneiro. A acción remataba coa lectura dun manifesto elaborado por parte do alumnado que integra o Grupo de Igualdade.

Memoria do Prestige: 20 aniversario

5 Decembro, 2022 por tiesaquis, posted in Charlas-Obradoiros,Comunidade escolar

No Aquis Celenis quixemos aproveitar este 20 aniversario do afundimento do Prestige para poñer en valor a solidariedade e a resposta social que xerou. Unha resposta social que naquela altura, no ámbito docente, estivo moi conectada ao noso centro e que cumpría que se coñecese e recoñecese.

O luns 14 de novembro inauguramos nos corredores do instituto unha exposición de Arte Postal ao redor do Prestige que supuxera hai xa case 20 anos un traballo inxente do profesorado do Aquis. Para explicar a orixe e sentido da exposición, así como outras iniciativas nas que tivo un papel relevante aquel profesorado (moi especialmente a cadea humana de estudantes na costa entre Laxe e Muxía), organizamos unha charla con tres daqueles protagonistas: Lois Gil, Puri Cabido e Pedro Lamas.

O alumnado presente (1º de Bacharelato) puido complementar a visión dos feitos que xa obtivera da representación teatral de Chévere e, á súa vez, converteuse en transmisor desa información a todos os grupos de alumnado do centro a través de breves exposicións orais que axudaban a contextualizar a produción artística que se mostraba nos corredores.

Diversos departamentos didácticos (Bioloxía, Xeografía e Historia, Plástica, Música Lingua…) aproveitaron estas actividades no seu traballo docente.

Ademais, ao longo dunha semana, proxectouse na cafetaría, nos tempos de recreo, unha montaxe audiovisual sobre o Prestige que compilou o departamento de Bioloxía.

Traballando en igualdade

15 Novembro, 202215 Novembro, 2022 por tiesaquis, posted in Charlas-Obradoiros,Comunidade escolar

Desde a semana pasada están en marcha no instituto varios obradoiros coordinados polo departamento de Orientación coas titorías de 1º e de 4º da ESO. Son actividades froito da colaboración co Centro de Información á Muller do Concello de Caldas que foi quen nolas ofertou. Seguimos pois participando en accións que buscan espallar valores de igualdade e respecto e que sirvan para combater a través da reflexión e do coñecemento o machismo presente na sociedade.

No caso de 1º da ESO serán catro sesións e levan por título Quérote, quérome. Para 4º da ESO escolleuse traballar en dúas sesións nas se procura nos mozos a reflexión sobre novos xeitos de entender a masculinidade e nas mozas traballar conceptos como empoderamento, diversidade sexual…

Participación na Digitalweek

14 Novembro, 2022 por tiesaquis, posted in Comunidade escolar,Saídas

Desde o domingo 30 de outubro ata o sábado 5 de novembro, 24 alumnas e alumnos do Aquis Celenis participaron na Digitalweek 2022, un programa da Consellaría de Educación que ten como obxectivo principal proporcionarlle ao alumnado unha actividade de inmersión lingüística que lle permita mellorar as súas destrezas de comprensión e expresión oral en lingua inglesa, co apoio de profesorado nativo nesta lingua, a través de actividades dixitais.

O Aquis Celenis, anfitrión nun intercambio do programa JAVACAL

23 Outubro, 2022 por tiesaquis, posted in Comunidade escolar,Saídas

Nesta semana que vén de rematar, acollemos no noso instituto a dous grupos de alumnado e profesorado cos que compartimos un programa do Ministerio de Educación para o Agrupamento de centros ao denominamos JAVACAL (Jaén, Valladolid, Caldas de Reis).

Na tarde do pasado mércores 19 de outubro recibímolos cun xantar no que se implicaron de maneira exemplar as familias de 4º da ESO. A partir dese momento comezou a forxarse un bo ambiente de interrelación entre a rapazada ao longo das actividades previstas: os xogos de presentación, o roteiro por Caldas guiado polo noso alumnado e a acción de concienciación ambiental na contorna da carballeira, cunha limpeza na que participaron os tres centros.

Na xornada do xoves 20, todo o alumnado participante (un centenar de rapazas e rapaces de 3º e 4º da ESO) puido coñecer o proceso de elaboración das conservas na fábrica de Dardo en Vilanova de Arousa e, a continuación, dar un paseo pola vila de Cambados. Cara ao final da mañá visitamos o Mosteiro da Armenteira e, despois de xantar, fixemos unha actividade de dinamización lingüística: o alumnado de Baños de la Encina e o de Valladolid pensaron lemas cunha mensaxe positiva e de apoio ao uso do galego por parte da mocidade de Caldas. O noso alumnado ocupouse de axudarlles a trasladar esas mensaxes á nosa lingua. Magnífica participación e necesaria mensaxe de apoio á diversidade cultural e lingüística.

Pola tarde, gozamos da zona histórica de Pontevedra e acabamos descubrindo onde se atopa e cal é a historia do “Tesouro de Caldas”.

En definitiva, ao longo do día e medio de convivencia dos tres centros, puidemos comprobar o efecto motivador do traballo colaborativo e interdisciplinar así como o enriquecemento persoal e educativo que provoca no alumnado e no profesorado.