Milla solidaria e pola lingua

Dentro das actividades do programa de dinamización da lingua 21 Días co galego e +, este pasado luns 30 de xaneiro o alumnado da ESO do Aquis Celenis participou nesta iniciativa conxunta co Afonso VII. A actividade física como hábito saudable, a solidariedade coa veciñanza menos favorecida e a mensaxe de apoio e de confianza no futuro do noso idioma confluíron de xeito complementario na realización desta actividade.

Ao día seguinte, o martes 31, unha representación do alumnado do Aquis fixo entrega aos Servizos Sociais do Concello de Caldas de Reis dos produtos non perecedoiros recollidos como inscrición voluntaria e simbólica na Milla.

Grazas a toda a comunidade educativa do Aquis Celenis pola súa colaboración.

AstrónomAs

Este luns 30 de xaneiro remata a exposición AstrónomAs no Aquis Celenis; unha mostra que chegou ao noso centro por iniciativa do profesorado do Club de Ciencia e grazas á colaboración do Observatorio Astronómico R. M. Aller, da Universidade de Santiago de Compostela.

Desde o pasado día 17, toda a comunidade educativa do Aquis puido achegarse a esta exposición que fai visible as achegas de moitas investigadoras que procuraron botar luz nos misterios da Astronomía.

A través de dezaseis paneis ofrécese gran variedade de contidos e elementos interactivos que mostran o protagonismo que tiveron e teñen as mulleres nesta disciplina.

Especialmente motivador para o alumnado foi o xogo interactivo de busca de pistas ao que o se accede a través de códigos QR.

• 

• 

• 

• 

• 

• 

• 

• 

• 

• 

Charla sobre Teledetección

Este pasado venres 20 de xaneiro tivo lugar no noso instituto unha charla sobre “Teledetección” a cargo de Verónica Santalla del Río, profesora titular do departamento de Teoría do Sinal e Comunicacións da Universidade de Vigo. Foi organizada polos departamentos de Física e Tecnoloxía, como actividade do grupo de divulgación A ciencia nas súas mans, e ía dirixida ao alumnado de 2º de Bacharelato das materias de Física e Tecnoloxía Industrial II.

Saúde mental: loitar contra o estigma

Coa coordinación do departamento de Orientación, o luns 12 de decembro presentáronse nas aulas de 1º ESO A e B as pezas divulgativas creadas no marco do proxecto “Un intruso no meu cerebro”, ideado pola Asociación Lar Pro Saúde Mental en colaboración coa Consellería de Sanidade da Xunta de Galicia, e dirixido á loita contra o estigma das enfermidades mentais na mocidade de entre 11 e 13 anos. Trátase dunha Campaña de Sensibilización sobre a saúde mental no ámbito infanto-xuvenil a través de diversas pezas divulgativas (cómic, curta de animación, GIF, adhesivos e pasatempos), deseñadas dende unha perspectiva lúdica, dinámica e divertida.

Derivado da anterior actividade, comezamos o ano parabenizando ao noso alumnado de 1º da ESO pola súa meritoria participación no concurso do citado proxecto e no que resultaron premiadas con cadanseu terceiro premio as alumnas Carla Pérez Montero e Lara Piñeiro Garabán.

Reactívase a Escola de familias

Logo duns anos de pandemia nos que houbo que parar moitas dinámicas xa creadas, este curso no Aquis tratamos de ir activando algunhas propostas que cremos fundamentais para a nosa comunidade educativa. É o caso da Escola de familias que, coordinada desde o Departamento de Orientación, achegou unha primeira xornada formativa sobre como acompañar aos fillos e ás fillas no bo uso das novas tecnoloxías.

A relatora foi Jeniffer Herbón, psicóloga xurídico-forense, especialista en mediación. É ademais creadora e formadora de ConVive+.

Previamente, Jennifer desenvolvera tamén unha sesión divulgativa, para o alumnado de 1º da ESO, sobre as oportunidades e os riscos que ofrecen as novas tecnoloxías.

dav

dig

dav

As bestas: cinema para o debate

Cartel do filme, tirado da web Fotogramas

Coa vontade de achegarlle diferentes linguaxes e suscitar debates e reflexións desde as diversas materias, o alumnado de 2º de Bacharelato asistiu o pasado martes 29 de novembro, nos Cines Avenida de Caldas, á proxección da película As bestas.

Esta actividade serve para conectar a actualidade co proceso de aprendizaxe posto que o filme de Rodrigo Sorogoyen vai ser sen dúbida un dos acontecementos cinematográficos do ano.

25 N: combatendo a violencia contra as mulleres desde a educación (II)

O Día Internacional para a eliminación da violencia contra a muller conmemorouse este 25 de novembro no Aquis Celenis con dúas accións que se sumaron a todo o comentado xa en anteriores entradas. 

Por unha banda, sumámonos á proposta dun minuto de silencio, ás 12:00 do venres 25, do Observatorio Galego da Violencia de Xénero. Fixémolo diante da entrada do instituto e visibilizamos, vestindo de negro, o noso rexeitamento a todo tipo de violencia contra as mulleres. Neste sinxelo acto lemos tamén o poema “Perségueme a historia…” de Luz Airado Bello.

Ademais, ao longo de toda a mañá, desenvolveuse no centro unha acción artístico-reivindicativa coordinada polo departamento de Música. Un total de 9 alumnos/as de 1º Bacharelato, repartidos en grupos de tres, pasaron polas aulas do instituto para recitar, con acompañamento musical,  o poema “O xiz” de Andrea Fernández Maneiro. A acción remataba coa lectura dun manifesto elaborado por parte do alumnado que integra o Grupo de Igualdade.

25 N: combatendo a violencia contra as mulleres desde a educación (I)

Ademais dos xa referidos obradoiros dirixidos ao alumnado de 1º e de 4º da ESO, o noso Departamento de Orientación coordinou en colaboración co CIM de Caldas de Reis dúas actividades lúdicas e con vontade de remexer conciencias ante a violencia machista. O alumnado de 3º da ESO asistiu o xoves 24 de novembro, no Auditorio Municipal, á representación da obra #2pilgrims, de Redrum Teatro. Ao día seguinte e no mesmo escenario, a compañía Serea Teatro representou para o alumnado de 2º de Bacharelato a súa obra Sen lingua.

Conferencia da catedrática María Victoria Otero Espinar

• 

• 

• 

• 

• 

• 

Novembro é o mes da Ciencia e desde hai xa máis dunha década o profesorado galego decidiu reivindicar tamén a ciencia na nosa lingua.

Nesta liña, este curso tivemos a honra de acoller no Aquis Celenis unha das conferencias científicas do Ciclo “Aida Fernández Ríos”, que promove a Deputación de Pontevedra e a Real Academia Galega de Ciencias. Foi o pasado 17 de novembro e correu a cargo da catedrática Mª Victoria Otero Espinar que expuxo o seu relatorio “Tris-tras coas matemáticas xa o terás” a alumnado de Ciencias de 2º e de 1º Bach.

Teatro para visibilizar as mulleres científicas

O departamento de Físca e Química organizou unha saída o martes 25 de outubro co alumnado de 4º ESO B (que ten todo a materia de Física e Química) e co de 2º Bacharelato que cursa a materia de Física.  Tratábase dunha proposta de teatro científico, Recordando a Lise Meitner, con posterior coloquio, que tivo lugar no Auditorio Abanca de Compostela. É de xustiza situar no lugar que lles corresponde a Lise Meitner e a outras mulleres imprescindibles na investigación científica que quedaron ocultas tras figuras masculinas e que capitalizaron en exclusiva o recoñecemento dun traballo compartido.

Lise e Otto Hahn no seu laboratorio de Berlín arredor de 1910. Crédito: Archives of the Max Planck Society.